Depang Tiang Ngayah Jumah

Gambar pakaryan AG. Pramono

Olih: I Madé Sugianto

 

MAKEJANG siep disubané i bapa nuturang tatujonné nekaang nyama tugelan lan nyama tunggalan sembah. Bapan tiangé ngidihin nyamané papineh unduk pajalan tiangé lakar ngantén. Yén sing sambatang ajak kulawarga, bisa mesuang biuta. Sambatang bisa masih sing mragatang gaé. Makejang pelih. Apabuin pajalan tiangé ngantén sungsang.

Tangkah tiangé nrugtug ngantosang isin papineh nyaman bapan tiangé. Kanti telung menit tusing ada ngemaang pajalan. Bapan tiangé nyumunin ngraos, nyambatang ngidih pajalan unduk pianakné ngantén.

“Apa makrana Luh Putu nyemak pajalan kéné?” patakon kelian nyama tunggalan sanggahé ané kasudi dadi panglingsir.

“Luh Putu ngelah nyama muani ané lakar nerusang swadharma dadi sentana, ngajegang umah. Tusing taén ada pajalan kéné dingeh kalaksanayang olih kramané. Yén ba ngelah nyama muani, ané luh ngantén ka sisi,” panglingsiré nugtugang mesuang isin atiné.

Maklengek tiang ningehang raos panglingsiré. Tiang tusing nungkasin, mula beneh tur ané majalan uling pidan mula kéto. Yén suba ngelah nyama muani, ané luh ngantén ka sisi. Tusing cara anak luh manyama adiri apabuin paturu manyama luh ané ngranayang reramané nyaratang pianakné nengil jumah maimbuh ngalih kurenan nyak nyentana. Yadiastun tiang ngelah nyama muani, dija pelih tiangé ngantén nengil jumah, yén ada anak muani nyak nyentana. Kabenengan ané jani tiang maan calon kurenan nyak nyentana. Tiang nongos di jumah padidi, ngayahin rerama padidi, tusing meratin nyama tugelan bapan tiangé apabuin nglantingin nyama tunggalan sembah, dija pelih tiangé ngajakin muani nyentana?

“Singsal dingeh pajalanné Luh Putu lakar ngantén tur nengil jumah dadi sentana rajeg. Tusing ada anak kéto yén suba ngelah nyama muani. Dresta iragané tusing ada kéto. Apabuin Luh Putu ngantén ajak muani uling dauh tukad. Sinah adat lan agamané béda,” panglingsiré negesang.

Bapan tiangé nengil, kéto masih nyama ané lénan. Tuah panglingsiré dogén ané ngomong. Pedas dingeh panglingsiré nuekang unduk agama. Manut panglingsiré, upacara pawiwahan sida majalan yéning purusa lan pradana agamané paturu patuh. Saagama apang dadi masanggama nganutin dresta. Panglingsiré nyihnayang pawiwahanné ento waluya negakin jukung. Kénkénang jukungé lakar majalan yéning tayungan dayungé singsal tusing patuh itungan. Ento mawinan anak ngantén apang agamané patuh.

Makejang nengil, tusing ada nimbalin pitutur panglingsiré. Disubané tiang baanga galah ngomong ditu kal pesuang isin kenehé. Makejang tutur panglingsiré kal benehang kerana uling malu suba kéto pajalanné. Tiang tusing nyesedin unduké ento kerana precaya tusing lakar maan pasaut ané beneh. Sajaba pasauté dresta, awig-awigé mula kéto. Kéto masih unduk ngantén apang paturu agama ané patuh tiang cumpu tur satinut. Yén alihang conto, liu artisé ngantén béda agama. Yén suba kadasarin tresna, kulawarga bagia tusing taén ada kanda nguyutang agama. Sentanané disubané kelih dadi milih nugtug agama bapané apa méméné. Kabenengan tunangan tiangé nyak nugtug agama calon somahné. Unduk béda agama tusing sandang buin uyutang.

Ané santulan di keneh tiangé, nguda nguyutang nyama dauh tukad. Kadén suba biasa ada anak dura negara, turis nyentana di Bali. Patutné panglingsiré bangga kerana angga kulawargané nyidang ngajak anak muani nyentana tur nugtugin agama iragané. Bandingang nyama Baliné paid bangkung kerana  nyeburin lan nugtug agama somahné.

“Ampurayang titiang pekak, yéning pisaut titiangé tan mungguh ring kayun. Tan wénten keneh tiangé pacang nglawan dresta napimalih nungkasin pikayun anak tua. Yadiastun tiang kaucap lua buduh, kal terima. Santukan gedé keneh tiangé ngayahin rerama ané ngancan tua.”

“Keneh iluhé subhakti tekén rerama mula ento ané saratang. Kéwala ingetang, iluh ngelah nyama muani, sentana rajeg jumah dini. Rasa sayang, rasa tresna tekén rerama, ngayahin rerama tusing musti iluh ngoyong jumah ngajakin muani nyentana. Uling jumah pisaga masih dadi, kéwala apang tusing baatan sibak, patuhang ngrunguang tur nyayangang rerama padidi tekén matuané. Pekak tusing némbahang iluh ngantén, kéwala pajalan iluhé ngantén singsal!”

Panglingsiré nuturang sentana luh dadi ngantén ajak anak muani mulih yén nyama muaniné sakit. Kasaran baan nyambatang buduh, sinah tusing nyidang nglanturang ayah-ayah di désa, ngayahin rerama jumah, ento makrana reramané nyaratang pianakné ané luh ngalihang pianakné muani nyentana. Kéto masih yén anak luh ngelah nyama tugelan muani adiri rumpuh, sinah tusing lakar nyidang magaé, anggon déwék padidi suba ngidih ayahan rerama ngidih ayahan nyama apabuin lakar ngayahin somah, sinah suba tusing nyidang.

“Ané tawang pekak, Luh Putu ngelah nyama muani tur mekén dadi dokter. Sinah tusing ada buin ané sangsiang!”

“Beneh sajan ento pa,” saut i bapa.

Bapan tiangé lantas nyambatang tekén panglingsir lan nyama tugelanné. Kadék Surya mula calon dokter, buin akejepan lakar wisuda. Disubané mawisuda nglanjutang koass, cara janiné magang di rumah sakit apang nincap uling sarjana kedokteran dadi dokter. Disubane koass lan kasengguh dokter, ada itunganné lakar nyalanin PTT, yéning lulus sinah lakar katugasang di tongosé sripit lan joh uling Bali.

“Disagét Kadék seleg tugas di tongosné PTT apabuin maan timpal ditu, ento ané jejehin. Sinah ia kapah mulih, sing kal ada natakin ayah-ayahnné jumah,” i bapa nyambatang pikobetné, yadiastun ento boya ané utama.

“Jani guminé tusing enu saklek cara pidan. Ayah-ayahan dadi bayah!” saut panglisiré.

Bapan tiangé nengil ningeh pasaut buka kéto. Panglisiré ngimbuhin, makejang kulawarga pacang bagia yéning Kadék Surya lakar dadi dokter yadiastun maan tugas joh. Pret pradé mani puan tugas joh tusing ada kal nguyutang ayah-ayahan di kulawarga muang di désa kerana pararem lan awig-awig suba mabenin apang adung ajak aab jagaté jani.

“Yén Kadék Surya tugas tur nengil joh, Luh Putu dadi nengil jumah ajak kulawargané nanging boya dadi sentana rajeg. Tuah Kadék Surya ané purusa jumah dini. Yadiastun Luh Putu ngantén ka sisi, mula dharma sentana nyayahin lan ngrunguang rerama!” teges panglingsiré.

Bapan tiangé nengil tusing masaut, mirib ngantosang nyama lénan ngemaang tetimbang. Tiang tangkejut ningehang piteket panglisiré, raosné makulit. Dharma sentana mula ngrunguang lan bhakti tekén rerama. Dadi nengil di jumah bajang kéwala boya sentana rajeg, kena baan tiang ngartiang, panglingsiré tusing cumpu tiang nengil jumah, dadi purusa kerana maan muani nyak nyentana. Dot sajan tiang nyautin, nanging bapan tiangé tondén ngemaang galah, kéto masih panglingsiré tusing nuekin. Kal jantosang. Tingalin tiang nyama lénan kisi-kisi kéwala tusing pati mesuang isin papinehné, mirib patuh ngantiang panglingsiré ngemaang galah.

Panglingsiré  lantas nerangang unduk warisan. Ané pantes ngwaris di kulawarga tuah purusa manut dresta di Bali. Yéning meras sentana lanang, masih patut ngwaris kerana ia lakar nugtugang ayah-ayahan di sanggah, banjar, muang désa. Di Bali, anak luh sing maan warisan kerana tusing ngoyong jumah, ngantén ka sisi.

Dot pesan tiang nungkasin raos panglingsiré. Mirib tondén nawang Pasamuhan Agung Majelis Utama Désa Pakraman Bali ané ngundukang warisan di Bali. Pianak luh wiadin muani makejang pantes ngwaris, kéwala dumanné tusing patuh. Pianak muani maan duman waris ategen, ané luh maan asuun. Atenga lebian ané muani, ento adil bandingang ané luh tusing maan apa. Nanging keneh tiangé ngalih muani nyentana boya ngrebutin warisan. Tusing ngidih tanah, tusing ngidih duman pipis, yadiastun sing ngidih apa tusing lakar ngelidin warisan ayah-ayahan di sanggah, di dadia, muang di pura. Boya warisan artha brana tatujon tiangé ngalih muani nyentana, nanging sangkaning meled nglanturang warisan ayah-ayahan jumah tur nerusang sentana di umah bajang.

Tiang suba magaé, kéto masih calon kurenan tiangé suba magaé. Gajih tiangé ajak dadua yén punduhang nyidang anggon ngwangun kulawarga sadarana apang tusing meratin anak tua. Mirib panglisiré lan nyama tugelan bapan tiangé narka ané tidong-tidong. Tiang ngantén ngalih muani nyentana apang warisan i bapa tusing makisid. Bapan tiangé kasujatianné mula matatakan, ngelah tanah lan umah milehan ulian jemet magaé. Dadi kontraktor setata maan gaé, sekayané anggona meli tanah lan umah.

Mirib katarka calon kurenan tiangé nyak nyentana ulian ngedotang pagelahné i bapa. Tusing kéto kasujatianné. Mas Anton nyak nyentana ulian tresna boya ulap artha brana. Dugas paruman kulawarga, Mas Anton tusing kal ajak milu kerana suba katarka sijumu pasti enu paturu kelet. Kéto masih adin tiangé tusing milu kerana ia kuliahné di Jawa. Nanging tiang lan i bapa suba ngorahang tekén Kadék Surya pacang nekaang nyama. Apabuin basang tiangé suba misi, ento makada i bapa ngénggalang ngidih pajalan tekén nyaman-nyamanné.

“Ampura pekak kéto masih bapa jak makejang, tiang ngantén ngalih muani nyentana boya lakar magarangin warisan. Kéto masih calon kurenan tiangé nyak nyentana ulian tresna kerana ia nawang kaberebehan jumah dini,” kal wanénang ngomong yadiastun tondén baanga galah tekén i bapa.

Mirib panglingsiré lan nyama ané lénan ngelah rasa sangsi kerana calon kurenan tiangé boya anak Bali. Lumrah ortané nyama dura Bali biasa ngantén cerai. Sinah jejeh yéning tiang kalaina cerai tekén Mas Anton. Tusing makejang kéto, ba liu mabukti nyama Bali nyak nyentana disubané ngelah sentana magedi mulihné. Cerai tidong, enu masomahan masih boya. Kayang unduké ento dot kal omongang diastun tiang kaucap degag. Dot pesan tiang mesuang makejang isin kenehé. Mara makita ngomong sagétan i bapa suba ngmalunin.

Bapan tiangé nyambatang tusing lakar ngemaang pianakné luh warisan druwén panglisiré. Pinaka rerama lakar ngedum gelahné ulian sekaya padidi. Unduk dum-duman tanah lan umah suba karembugang ajak Kadék Surya. Apabuin umah lan tanah ané gelahanga tekén bapan tiangé suba kasertifikatang. Tiang, Kadék Surya, tur mémén tiangé onyang maan duman sertifikat. Kadék Surya maan duman duang umah, tiang ajak i mémé maan duman sertifikat abesik.

Bapan tiangé tusing makeneh sombong rikala nerangang pagelahné. Ento omonganga apang tusing ada narka tidong-tidong tekén pianakné ané ngalih muani nyentana. Parembugan di kulawarga dugas madum-duman madasar manah lascarya paturu cumpu pacang ngrunguang rerama bareng-bareng, pianak muani wiadin luh tusing mabinaan.

Garjita keneh panglingsiré ningehang pasautn bapan tiangé. Panglisiré masih negesang ngomongang warisan boya sangkaning ngelah papineh tidong-tidong. Kerana takut mani sentanané matungkas, makanda ulian warisan. Yén suba maduman paturu galang kadasarin manah las carya mula ento saratang apang bagia sakayang-kayang.

“Nanging bapa tondén ngresep nguda Luh Putu nyemak pajalan ngantén nyentana. Yén ulian Kadék Surya lakar dadi dokter tur nongos di tongos joh, sinah tusing bisa katerima. Yén unduk lakar ngayahin rerama, uling di jumah pisaga dadi. Apa sujatiné Luh Putu nyemak jalanné ené, ngalih muani nyentana nanging jumah ada nyama muani?”

Kal antosang i bapa nyautin. Nanging kanti limang menit i bapa tusing masaut. Mirib sangkaning kimud, lek nyambatang kasujatianné. Adin tiangé, Kadék Surya mula calon dokter. Onyang nawang ia seger oger, bayuné enteg, tusing ngaraksa sakit inguh ané pantes salinin ayah-ayahané tekén rerama lan désa. Tusing pantes gentinin unduk swadharma sentana ngayahin rerama. Tusing ada ané nawang, adin tiangé sujatiné sakit. Ia calon dokter, ia seger nanging kedisné gelem.

 

Kukuh, Soma Umanis Pujut, 1 Méi 2017


TAGS :

I Made Sugianto

I Made Sugianto lahir di Banjar Lodalang, 19 April 1979 bertepatan Wraspati Wage Dungulan (Sugian Jawa). Kini istirahat sejenak dari pekerjaan sebagai wartawan NusaBali untuk mengbadi sebagai Kepala Desa di tanah kelahirannya, Desa Kukuh, Kecamatan Marga, Tabanan.

Komentar