Blagbag

pixabay

Ulian sakitné Luh Sari, nyansan wai reramanné nyansan bingung. Apabuin sakitné Luh Sari sing nyidaang ngenehin. Sagét ngeling kraik-kraik, sagét kedék ngakak. To ngawinang Luh Sari jani mabelagbag. Makedadua limanné mategul. Batisné bareng mategul. Yén sing kéto, sinah Luh Sari lakar melaib sradak-sruduk. Dugasé maluan, dugasé Luh Sari konden meblagbag, sabilang sandikala Luh Sari melaib pati kaplug tulén bangkung paling. Sekancan ané tepukina di malunné terubuka. Tukad lan pangkung dalem-dalem ceburina.

Suba duang bulan jani Luh Sari ngaba penyakitné ento. Konyang pisaganné suba takoninina, kenapa pianakné bisa kakéto. Ada pisagané ngoraang Luh Sari sakit ulian kena bebai, ada ngorang penyakitné Luh Sari ulian kaguna-guna, ada masih pisagané ané ngoraang Luh Sari strés.  “Jani nak mula liu remajané déprési,” kéto pisagané nuturin. 

Pan Sari nyansan wai nyansan inguh. Ngoyong jumah, ningalin pianakné buka kéto sirahné marasa baat, awakné ngetor. Ento ané ngawinang Pan Sari sabilang wai sing taén ngoyong jumah. Yén sing ka tajen, Pan Sari meceki, yén sing meceki jeg pasti suba meangguran, negak-negak di perempatan jalanné gedé metékin montor liwat. Miribang tajen lan cekiné suba anggona penyelimur manah tekén Pan Sari.

Patuh ngajak semengané jani, Pan Sari suba meangguran di warungné Luh Rauh. Meli kopi, godoh, lan roko. Ningalin Pan Sari ané negak di malun warungné, iseng-iseng Luh Rauh metakon. “Bli, suba seger pianaké?”

Mireng petakon Luh Rauh, Pan Sari metolihan, nyedengang nyiup kopi ané suba nénggél di malun bibihné. “Bih berat Luh.” Pan Sari mesaut bawak, lantas ngelanjutang nyiup kopi.

“Pan Sari, yén sing pelih ban tiang, tiang ngelah timpal kekéné masih sakitné. Ia nyidaang seger ulian meubad ka psikiater,” Luh Rauh nuturin Pan Sari apanga Luh Sari énggal ngubadang pianakné ka dokter jiwa.

Ningeh tutur Luh Rauh Pan Sari kingeh-kingeh. Mirib ia sing ja ngerti ajak arti psikiater. Égar Pan Sari mebalik nakonin. “Apa maadan psikiater to Luh?” Pan Sari metakon sambil kenyir-kenyir, miribang ia lek ati ban kebelogané.

“Psikiater to artiné dokter ané ngubadin anak ngelah keneh sing waras. Psikiater to ngubadin soroh krama ané sakitné keraik-keraik, kedék ngakak, lan kenyem-kenyem sing beneh,” Luh Rauh lantas nuturang.

Ningeh kéto Pan Sari égar kenehné, miribang jani ia suba nemu jalan apang sakit pianakné énggal seger.

Pan Sari melaib mulih. Ngalih kurenané, seger sajan kenehné Pan Sari mulih, lakar nuturang unduk dokter ané nyidaang ngubadin penyakit pianakné. Tepukina Mén  Sari di umah metén sedeng meilih-ilih, minab Mén Sari engkeb sajan suud ngisiiang liman pianakné ané galak tur keraik-keraik.

“Méméné-méméné, jani jeg aluh suba, penyakit pianaké pasti énggal ilang,” Mén Sari metolihan. Mén Sari kesiab ningeh munyin Pan Sariné sing karuan unduk. Mén Sari lantas metakon, “Bli, nden malu, adéng-adéngang abeté ngeraos, tiang sing ngerti apa ané keraosang Bli to?”

Ningeh petakon kurenané ané nyujut buka kéto, Pan Sari lantas bengong. Mirib ia nu nginget-ngingetang isin reraosanné Luh Rauh. “Kéné méménné, Bli tunian suba maan metakon ngajak Luh Rauh, ia ngoraang nawang tongos dokter ané dueg ngubadin penyakit anak keraik-keraik, kedék ngakak, lan penyakit anak ané kenyem-kenyem sing beneh.”

“Terus-terus?” Mén Sari negak maekang.

“Dokteré ané dueg ngubadin to kaadanin psikiater Luh,” kéto pesautné Pan Sari.

Ningeh tutur kurenané buka kéto, Mén Sari lantas bangun ka umah paon, ngalain Pan Sari di umah meténné kenyem-kenyem ningalin pianakné. Pan Sari lantas maekin pianakné ané mebelagbag. Paekina tekén bapané, Luh Sari kenyem-kenyem puyung. Peliatné joh. Pan Sari lantas ngusap-usap bok Luh Sariné nyansan wai nyansan medikang. Awakné nyansan wai nyansan meragang. Muané pekos. Né nu mesisa tuah tulang ajak kulit dogén. “Sabar luh, jani bapa suba nemu ubadné. Sing ja mekelo Luh lakar ngaba sakité ené,” kéto Pan Sari nuturin pianakné. Nanging Luh Sari sing ja rungu. Peliatné tetep joh.

“Méménné, mani laan bareng-bareng ngatehang pianaké meubad,” Pan Sari ngomong, sambil mekipekan ka umah paon. Nanging sing ada pesaut. Mén Sari nedeng sibuk ngupin sémprong. “Méménné, mani laan bareng-bareng ngatehang pianaké meubad,” Pan Sari nyumunin ngomong, sada bangras.

Uli di bungut paoné Mén Sari gelur-gelur nyautin pengajak kurenané. “Bli, naang té kenehang malu, kuda bli ngelah pis sangkan agem sajan bli lakar ngubadang pianaké kema?”

Ningeh petakon kurenané buka kéto, Pan Sari mekipekan. Paling.

“Kadén Bli mayah limang tali, selaé tali, séket tali. Maubad ka psikiater apang Bli nawang, paling bedik mayahné limang atus tali Bli. To mara acepok, ondén yén meubad ping lima, ping nem.” Mén Sari nglanjutang raos sambil ngulak-ngulikang baa api. “Kalingké limangatus tali rupiah, duang tali rupiah sing taén misi di kantong belinné. Hasil pegaén beliné tuah anggon beli meliang-liang pedidi. Matajen, matuakan, lan meceki. Bli mulih sing sajan taén nyisaang pis. Jani, dinemu sengsarané buke kéné, mekejang biayané ben pipis Bli, tusing ja ben munyi dogén.”

Ningeh raos kurenanné buka kéto Pan Sari bengong. Apabuin ningeh pemayah dokteré ané liu sajan, ilang semangatné Pan Sari lakar ngubadang pianakkné. Pan Sari sing ja nawang yén pemayah ubadé di psikiater liu kekéto. Ané kadengangé tekén Pan Sari psikiater to patuh ngajak dokter-dokter né ada di puskesmas, né dadi bayah ban pipis limang tali rupiah. Pan Sari mejujuk, lantas megedi sambilanga ngeremon. “Nah, pedidi suba nyai ngitungang. Jelema luh liunan munyi.”

Di bungut paonné, diastun baa apiné sube ngilab, Mén Sari nu iteh bungkut-bungkut ngupin sémprong. Yéh peningalané mekumbengan. Ngenehang pianakné ané sedeng meblagbag tan padaya. Yéh peningalan Mén Sariné suba mekumbengan ulung paketéltél.

 

Amlapura, Désémber 2010


TAGS :

I Gede Aries Pidrawan

I Gede Aries Pidrawan adalah Wakasek SMK PGRI 1 Amlapura. Sering memenangi lomba penulisan cerpen. Aktif membina teater.

Komentar