Galuh Ratna

wit gambar: pixabay.com

Tuara sida antuk nandingin kajegegan gumi Baline, mirib tuara konyang lakar anake ngorahang jegeg, minabang ganteng. Odah-odahe ne kedek pawah, nyolahang lemuh egolanne, sisan-sisan bayune sekadi jaga ngorahin generasine jani yen ipidan dugase enu bajang ia tuah penari ne kasub masolah, jiwane masolah antuk sisan-sisan bayune.

            Rare-rarene melaib-laiban di natahe maabu, ngepungin pitike ne crarat cririt kiak-kiak kemu mai, masa meganti, rare-rare puniki tuah Baline riwekas. Tiang driki nyaksiang sami, jeprat-jepret antuk kamera. Foto niki sane ngarekam galah ne riwekas lakar dadi sejarah.

            “Bli Tu, niki teh alih dumunkenten anak istri nika ngabaang tiang teh anget lan jaja pisang rai saking paon, ipun tuah Kadek Ratri, adin timpal tiang Wayan Nata, sane tumpangin tiang nginep i peteng.

            “Suksma Dek, Dek sing megae jani?”

            “Tiang megae jam sia, Bli Tu lakar pesu jani?”

            “Ao Dek, Bli lakar ka pura Puseh, lakar ngerereh gambar drika.”

            Seneng tiang jeprat-jepret, ngawinang tiang demen kema mai, aget masi tiang akeh medue timpal sane nukung demene niki.

            “Dek, Bli Tu lakar ka pura Puseh jani, odahe tonden bangun?” tiang metaken ring Kadek indik odahne.

            “Dereng Bli Tu, kari sirep. Nah, nyanan Dek ja ngorahang.”

            Odahne Kadek epeh sajan ring timpal-timpal cucune, rumasuk dewek tiang. Wayan Nata taen nyaritayang ken tiang yen odahne ento tuah pregina dugase kari bajang. Ipun kasub sareng sekaa arja bon-bonan, dados galuh nyane. Yen sampun ipun kauningin masolah, cerik kelih tua bajang rauh mabalih. Sane pinih kaingetang tuah rikala ipun naenin kaundang masolah ring Istana Tampak Siring antuk Presiden Sukarno kala ento. Sewai tiang ngenehang kenken ya ipun ipidan rikala masolah, sabilang tiang ningalin panyingakan ipun lan kedek ipune.

            Tiang sampun neked ring jaban pura Puseh, duh Hyang Widhi, asri pekardin Ida antuk para jatma sane anteng ngaturang ayah, setata makenyem manis, makedekan. Anduse ngepul putih di sisi jaba kelod. Sisan-sisan pekaryan sampun katunjel, resik. Cahyan surya nelusuk, ibu-ibu makebaya makta aturan, sepanan tiang ngambil kamera. Ring jeroan para pemangku nguncarang japa mantra, asep dupane mangepul miik, kidung sembah ngulangunin manah. Ring pewaregan, lanang-lanange ulet mekarya adonan, jukut ares, sate lilit, makedekan nanging sumeken ngayah. Raris irika wenten anak lanang nyapatin tiang,

            “Tu, nyanan buin ka pura nah, ada arja!” Kenten Bapa dangin, adin bapanne Wayan Nata ngingetin tiang.

            “Nggih Pa, tiang pastika teka.”

            Irika naler tiang kacapatin olih Gede Raka, lan Tut Robin, timpal-timpalne Wayan Nata, saha kakenalang sareng timpal-timpal lianan drika. Tiang polih nyarengin makarya sate ajebos, wus punika sareng-sareng nunas ring pewaregan. Sadereng mapamit tiang sareng-sareng para wargane ngaturang pangubakti.

            Gede Raka lan Tut Robin ngorahang lakar majalan makarya tur ngingetin tiang apang nyanan singgah melali mulihne.

            Sakabesik lanang-lanange mapamit, tiang kari ring jaba tengah ring genah sasolahan arjane rahina nyanan jaga kapentansang. Sampun kapayasin, langse pradane sampun kapasang. Keneh tiang ngulayang. Inget tiang ring carita indike odah Ratna, Sang Pragina Galuh. Sajan ne jani solah-solahan tradisional Baline sampun kalah mesaing sareng walih-walihan ring TVne. Sajan ne jani para praginane tusing mataksu, nanging miribang tiang ne salah, boya ja pragina-pragina iragane tusing mataksu, nanging miribang samian tuah madue galah nyane.

            Ipidan driki Galuh Ratna ngayah masolah, katonton olih ketog semprong para warga desane, turmaning saking desa lianan ne naler ningeh indike ipun sane naenin masolah ring Istana, ne tuara je liu pragina ne sida masolah irika. Sane tuara sida nonton riantukan baas kaliune anake majeljel, baan ningeh jangih suaran ipunne rikala magending, sampun ngerasayang lega tan kadi-kadi. Bulu kalong tiang majujuk.

            Peteng Purnama, buin kejep gen sasolahan arjane jaga kakawitin, para penabuh sampun sayaga. Irika naler wenten bapa dangin, sane ngisiang kendang. Asiki pamangku ngaturang canang ring natah pamentasan, mapinunas ring Ida Batara sami dumogi ja walih-walihane mamarga antar. Kamera tiang sampun uli tunian jeprat-jepret. Dek Ratri sareng timpal-timpalne sane negak irika tan luput antuk jepretan kamera tiange. Rikala tabuhe ngawit, sakabesik warga ne nekanin, dereng ja akeh pisan. Suara tabuhe ngurub langit saking pangeras suara.

            Kapertama pesu Desak Rai lan Liku, tingkah lan banyolanne ngae sami anake briag briug kedek, alit-alite sane mabalih di malu kakencanin olih Likune, kenten naler Jro Mangkune kacandain olih Desak Rai. Tiang masih tan sida naenang kedek, boya ja sanget ulian daging banyolanne sane rasayang tiang biasa-biasa dogen, nanging ulian dueg baan ipun masemu, pangus. Ningalin muanne dogen kadirasa tan sida baan tiang yen tan kedek.

            Irika laut pesu pragina lianan, tiang mataken ring bapak di sampingne ngorahin tiang yening nika tuah panyeroanne Galuh.

            “Nah, ne jani aturin malu Ratun awake medal.”

            “Inggih, ratun titiang Galuh durus medal ratu … “ keto abetne i panyeroan.

            Nadaksara tabuhe mareren, sami panontonne naler siep, makesieng bayun tiang. Saking tengahing langse dingeh tiang suara punika, Galuh sane magending. Saka besik wargane teka malih, ne mangkin lingsir-lingsirene liunan teka, pekak lan odah-odah, kaicen margi olih para wargane mangda nyidang manonton saking arep, di jalanne kantun akeh anake rauh.

            “Galuh RatnaGaluh Ratna buin ngigelkenten dingeh tiang saking asiki odah-odah.

            Yakti, rikala langsene mabuka, tabuhe ngebyar. Suara nika tuah gelah Galuh Ratna, tepuk tangan para wargane sami, ngembeng-ngembeng yeh matan tiang tan sida naenang rasa suka cita antuk napi sane kesaksiang tiang mangkin iriki. Yadiastun tan sakadi duk dumun, nanging seldet ipun, kenyung ipun, kantun idup. Galuh Ratna tan wentenne sida ngentosin. Tan ja makelo odah Ratna masolah, yadiapi tiang sida ningalin yening di keneh ipun ne dereng ja makeneh suud masolah, nanging tuah kulit lingsir ipunne ngewatesin.

            Rahina mangkin sampun tigang rahina saking pamentasan nika. Tiang polih kabar duka saking timpal tiang Wayan Nata indik odah sane i peteng sampun ngalahin. Wayan nyaritayang kenken kendel odahne rikala nyingakin fotone dugase masolah ring pura Puseh nika. Foto nika setata kebakta sirep, tur nimpalin ipun luas ka tanah wayah.

            Ring dina pengabenan nyane, semangat para wargane ngerauhin sekadi nyihnayang semangat odah Ratna dumun ngayah rikala idup, turin asih ipun ring nyama braya. Iriki wenten Wayan Nata lan Kadek Ratri ring samping tiang pinaka generasi muda ne jaga ngelanturang semangat ipunne.

            Odah, lanturang pemargi nuju soarga loka, Galuh Ratna tuah abadi. PE


TAGS :

Agus Sutrarama

Agus Sutrarama lahir tahun 1984. Aktif menulis sajak dan cerpen berbahasa Bali di media massa Bali Orti (suplemen Bali Post) dan majalah Canangsari.

Komentar