LAWAT BULAN KALANING SEPI
By IBW Widiasa Keniten- 06 Oktober 2020
Sinalih tunggil pupulan puisi Ida Bagus Pawanasuta mamurda Sepi. Pupulan puniki kacitak olih Pustaka Ekspresi, Tabanan, warsa 2020, wénten enem dasa puisi. Puisi-puisi sané kasurat pinaka unteng rasa, unteng pikayunan, unteng pinampén Ida Bagus Pawanasuta ring kawéntenan angga utawi ring pilehan angga. Katah pisan madaging cecirén utawi kasuksman sané mabuat. Yan sahihang ring pupulan puisi Puisi Pangasih Paméro dagingné nénten banget mabinaan. Sakéwanten ring basa wénten sakadi mabinaan amatra. Ring Pangasih Paméro yan imbayang sakadi grudugan toyan segara. Yan ring pupulan Sepi puniki manut sakadi murdané, dabdab, dangsah, sakadi toya ring telagané. Sakéwanten dagingné dalem pisan.
Sinalih tunggil puisi Lawat Bulan: petengé galang ulian bulan/dikénkéné ulian bintang/lawat bulan di danuné/kliab-klieb uyak ombak/buin ngenah buin ilang// lawat bulan di tukadé/ sayan kéweh baan nepukin/sing malawat ulian yéhé suluk/ngejer lawatné ulian yéhé ngigel/saru lawatné ulian yéhé puek// yén dot nepukin lawat bulan/cingakin di pasoné misi yéh/yéh ning ané degdeg/apang selah ngenah lawat bulané// Puisi puniki sakadi polih bantang rasa saking kakawin Arjuna Wiwaha pakardin Mpu Kanwa, Ndan asing suci nirmala mesi wulan. Yan pilah-pilah yukti pisan sakadi munggah ring puisi ring ajeng, mangda prasida polih wewayangan bulan gumanti ngrereh sané ening. Rasa ening, pikayunan degdeg, citta-budhi sané galang, piranti nyikiang pikayunan ngruruh Sanghyang Wulan. Sanghyang Wulan pinaka imba olih sang kawi mangda sida molihang arawat matra linggih Sanghyang Mahawulan, mangda sida molihang patut wénten utsaha. Utsaha ta larapana karya sing pageh-pagehen, sapunika Kakawin Ramayana maosang.
Mangda sayan antar pamarginé matemu ring Sanghyang Wulan, nénten wénten sané ngigu pikayunan, sang kawi mangda ngrereh rikalaning sepi. Sepi pikayunan mrasidayang ngwirasaang kautamaan Sanghyang Wulan, nerus ka telenging hredaya. Rikalaning sepi polih masadu ajeng ring angga mangda sida mulih ring sepi sakadi mungguh ring puisi Sepi: .../sepi/utamaning sepi/witning sepi/mulih ring sepi// sepi padaning sunya/ sepi sunyaning sunya/ sunya sepining sepi/ sunya sangkania/sunya parania/sunya/ sepi// Gumanti sripit pisan pamarginé mangda sida sepi, bilih-bilih mangda sida sunya. Yén nénten mawit kaswécanan minab jaga suéan milehang angga mangda sida sepi santukan sané mawasta kamanusan kabanda olih i dasa indria, ngabanda ring pamargin kauiripan. Yadiastun asapunika, taler patut tamtamin, dumogi kaswécanan sida molihang rasa sunya .
Pupulan puisi Sepi pakardin Ida Bagus Pawanasuta patut pisan anggén bantang geguat jaga ngamarginin kauripané sané katah kabanda antuk kagodan. Puisi-puisi ring pupulan puniki prasida ngicénin rasa galang rikalaning ngruruh sepi bilih-bilih rasa Sunya. Pupulan puisi Sepi puniki sinalih tunggil sarana utawi gegamelan mangda sida ngenduhang pikayunan sané sarahina gumanti kabanda olih i dasa indria. Dumogi sida ngenduhang pikayunan sané nénten anut ring pamargi kauripan.
(Anggar Kasih, Medangsia,Semarapura, 6 Oktober 2020)
.jpg)
Komentar