10 PUISI NI MADE GAWATI

  • By Ni Made Gawati, S.Pd.,M.Si
  • 28 Februari 2021
Foto: Tut Sugi

MANTRAM SUCI

 
Om Sembahing ulun
Majeng Sanghyang Siwa
Nanginin sang maurip
Angulati  sané sujati
Mantram suci jati ening
Anggén ngemban Sanghyang atma
Hatining  mawetu luih
Sangkaning manah susrusa
Ilikitaning mawastu
Wetunnya ambek dharma jati
Anggannya Sanghyang tiling
Yoga Samadhi katuju
Astiti bhakti wéhnya
Hayu  ayuning kaapti        

(Karangasem, Wraspati paing kulantir, 25022021)

 

JENGAH

 
Banggaang titiang nguntul iriki padidi
Manyelémpoh
Maguyang
Matédoh
Maplalian tanah
Nyakupang tangan kara
Nyuksemayang dumadhi
Kairingin pupuh Semarandhana

Minab kerasa déréng telas mamurti
Angkara murka
Satwam rajas tamahé
Durusang telasang pagelarané
Durusang mapakardi nginutin kita
Durusang matelasan sapisanan

Iriki misadya nyanggra
Nyadia mangantosang
Nyadia mangelungsur
Nyadia manyuksema
Pakantenan i ratuné

Nanging élingang
Ayu kinardi ayu tinemu
Ale kinardi ale tinemu
Karmaphala tan wenang lémpasin.

(Bumi Lahar, 14022021)

 

I LAYANGAN JONGKOK


Tilemé mawetu peteng
Petengé mawetu inguh karasa
Bulané engsut dibucu kangin
Makita manyujuh manyunarin
Nanging i layangan jongkok
Tuara makampid
Awak bongkok nyujuh langit
Pangkahan papineh
Joh para kaisinan
Apa buin tulis gidaté nyemah
Asing lampahang pelih
Ané pelih kapatutang
Ané patut kapeliang
Minab  suba paduman
Idupé mondong sengsara
Karmané  nibénin idup

Ngujang paundukan
Kakéné tuturang
Ngelekin ati
Suud mangeling
Suud makamben disunduk
Nyén nawang dimani puané
Cepolin bulan makalangan
Ditu penyuné mataluh
Tusing tuyuh buin manyunarin.

(Karangasem, , 11022021)

 

NGÉNDAH

 
Tusing pesan nawang rasa elek
Nyalanang pongah juari
Nagih kéné apang kaisinan
Nagih keto ngadu kakerengan
Ambekné nyunyur manis di maluné
Nyikut nyaréré di duri

Mawinan kéweh narka ajepan jatma
Déwékné nagih ajiang
Akijapan maseliog
Niskala nibénin
Ririh tan kadi kadi
Yén andéyang i wukir agung
Luih kabinawa
Mangemit sarwa mala
Satata ngalih ngalihin kapelihan

 
Mirib ento madan latah gumi
Clebingkah betén biyu
Belahan pané belahan paso
Gumi linggah ajak liyu
Ade kéné ade kéto

(Bumi Lahar, 16022021)

 

NENG ONA NANG OVID

 
Yén kenehang
Pejalan idupé jani
Cara taluhé apit batu
Suba kateteh buin katangkeb gering
Sapetekan Néng Ona lan nang Ovid
Ngangsan wai ngangsan meranénin

Akéh kramané lampus
Mawinan jejeh matindakan
Jumah dogén kerasa sumpek
Yéning pesu tangar peliaté
Mituutin  tuntunan Hyang Maha Wisésa
Ngajegang protocol keséhatan
Jemetang mersihin tangan
Johin genah ramia
Bibihé masengseng
Ngomong kital
Mendep santulan

Yén pinehin
Ngujang buin dawanang
Tuah ajak makejang
Né maadan sipta jagat
Damuhé  tuah ngidayang marencana
Apang tusing kéné
Apang tusing kéto
Ngacuh papinehé
Ingetang ané abesik
Eda san ngengsapina
Gelarang sawai sawai senjatané
Boya bom
Boya nuklir
Ajak makejang pada ngraksa
Tusing lén tuah
Mangrastiti bhakti majeng Sang Sangkan Paraning Dumadhi

(Karangasem, 12022021)

                                  

NGUDPADI KAURIPAN     

 
Lampah I ketunan
Sunaring hyang suci
Mawarni sarining padma
Wahyadiatmika
Sembah pangubhakti
Puji mantram katuju
Sabdaning hyang achintya
Sandi bhakti ngudpadi jagat
Lokham samesta sukino bhawantu
Tatwaning linggih Hyang Aji
Saraswati malingga yukti
Sang sangkan paraning kaapti
Lugrayang mulya mangubhakti
Sidha sidhaning don kapanggih

Katawengin I tunjung biru
Makecaya siratan suci
I sekar ngudpadi rahayu
Masikian kaeningan kayun
Mapahyun Hyang Bhatari
Anglebur leteh ring akasa
Ngudpadi karahayuan jagat.

        (Karangasem, 12072020)

 

SASTRA AJI

 
Rasa sumanangsaya makeliah
Ring tungtungin hati
I ketunan mabudi
Nyumpangang sekar ring siwadwara
Pawisik sampun sinah
Tuntunan ring tungtungin lidah
Sakémawon
Sukil ngaruruh
Sané kasengguh
Aksara utamaning rasa
Tan lian wantah
Plekutus punika
Hanacaraka
Datasawala
Magabanga
Pajayanya
Ang Ung Mang
Niyasa Hyang Maha tiling
Prabawan Hyang Dewi Saraswati
Pangurip Jnyana Sakti.

(Karangasem, 04072020)

 

MANIK KAURIPAN

 
Kerasa doh lamat lamat
Samar samar patut lan kaon
Duuh duuh kalangkung
Sakadi mutus hyang paramatma
Nirgamayang sander krepeg
Nyungsek sesek ring dada
Dereng prasida ngwales paayah ayah

Uduh ratu .....
Yen wantah kalugra
Sampunang dumun ambila
Sampunang empoka
Sampunang sumpanganga
I sekar kantun wimuda
Punika gumanti manik
Jiwa pramana kauripan

(Karangasem, Saniscara Wage Medangsia, 2019)

 

RAHINA MABASA BALI

 
R ahayu mabasa Bali
A ntuk kawagedan matata basa
H akena pinujuning rahina wraspati
I nucap sabdaning pemerintah daerah Bali
N ginggilang basa ibu lan busana Bali
A di luhung makeciri jagat

M adasar tatamian Hyang Lelangit
A stiti eling pakibeh jagate
B asa Bali wantah basa ibu
A kah budaya Bali
S or singgih sane kaapti
A ntuk pelajahan mautama katuju

B asa Bali kawitan Hyang Pertiwi
A ngrastiti para jana lan yowana
Lilayang rasa tan midep
I ncepang ngantos rikawekas

(Karangasem, 2018)

 

WIWÉKA

 
Yukti sukil ngamong urip
Sakadi taluh apit batu
Méweh mawiwéka
Lintang patut mawastu kaon
Lintang kaon mawastu patut
Satata pinaka pajekjekan
Antuk kasaté kalintang
Ngajap ajap i ketélan toya
Nyujur pinados caya
Ngruruh uttamaning patut
Yakti manah kayun sami sios

( Karangasem, 14 Juli 2018)

 


TAGS :

Ni Made Gawati, S.Pd.,M.Si

Lahir di Sengkidu, 19 September 1966. Mengajar Bahasa Daerah Bali di SMAN 2 Amlapura.

 

Komentar